Afskaplega fallegur og góður gjörningur hjá Snorra

Að mínu mati var gjörningur Snorra Ásmundarsonar í Hríseyjarkirkju afskaplega fallegur og vel heppnaður.

Listamaðurinn sýndi hvernig eðlileg og falleg messa getur farið fram, öfugt við þetta uppstrílaða gervi sem vanalega er boðið uppá.

Herða eftirlit eftir helgispjöll

N1 kaupir Krónuna

Nú hefur verið gengið frá því að N1 kaupi Krónuna, Elkó og önnur fyrirtæki. Forstjórinn fær bónusa eftir Ebitdu og Ebitdan er svindl, þar er ekki tekið tillit til fjármagnskostnaðar, þannig að hann getur hækkað launin sín upp úr öllu valdi með því að skuldsetja fyrirtækið upp í rjáfur. Það er alveg fráleitt að undanskilja einn stærsta kostnaðarlið fyrirtækisins við útreikninga á bónusum.

Þarna er verið að stórauka samþjöppun á markaðnum. Þetta eru ekki einkaaðilar, þetta eru lífeyrissjóðirnir. Ef illa fer að ganga, þá fara búðirnar ekki á hausinn eins og Víðisverslanirnar um daginn, þar sem eigandinn tapaði og þeir sem lánuðu honum. Nei. Aukið fjármagn verður sótt í vasa almennings í gegn um lífeyrissjóðina. Þetta er því formúla sem getur ekki klikkað, launþegar munu borga brúsann þegar illa fer að ganga.

Þannig eru lífeyrissjóðirnir notaðir til að okra að okkur í fyrsta lagi, og í öðru lagi til að baktryggja allt skítamixið.

Rekinn fyrir að segja skoðun sína

Ótrúlega fasískur hugsunarháttur hefur náð að festa rætur hjá Pírötum og vinstrielítunni. Það er orðið sjálfsagt í huga þessa fólks að ráðast að öðrum fyrir það eitt að tjá skoðanir sínar ef þær skoðanir eru ekki "réttar". Þeim finnst sumar skoðanir svo rangar að það réttlæti hvaða framkomu sem er.

Nýlega var maður rekinn sem formaður Félags Framhaldsskólanema fyrir það eitt að skrifa pistil um það að hann teldi kynjafræðikennslu óþarfa. Hvað ef maðurinn hefði skrifað að hann teldi dönskukennslu óþarfa? Hefði hann þá verið rekinn? Nei. Þarna er pólitísk rétthugsun komin á það stig menn eru reknir fyrir það eitt að tjá skoðun sem ekki fellur að meginstraumshugsun vinstrimanna.

Svipað var uppi á teningnum varðandi heimsókn forseta Danska þjóðþingsins. Hún hefur viðrað einhverjar skoðanir sem pírötum og vinstrafólki líkar ekki og þá á bara að sýna forseta Danska þingsins fingurinn þó svo að henni hafi verið sérstaklega boðið hingað. Hún var ekkert að trana sér fram, það var óskað eftir því að hún kæmi hingað.

Erum við komin á þann stað að við getum ekki haft eðlileg samskipti við fólk sem hefur aðrar skoðanir en við sjálf?

Ef hingað kæmi aftur á móti fulltrúi frá erlendu ríki sem hefði þá skoðun að réttast væri að höggva hendur af fólki sem bryti af sér, þá yrði ég ekki hissa á því að Píratar og vinstrielítan myndi flykkjast á staðinn og fagna manninum mjög, því þannig skoðanir eru ekki svo slæmar að mati Pírata, að sýna skuli þeim einhverja sérstaka fyrirlitningu.

Aflaverðmæti jókst um 33%

Í vor hugðist ríkisstjórnin afhenda útgerðinni 2,7 milljarða úr ríkissjóði með því að lækka veiðigjöldin. Þetta var sagt nauðsynlegt vegna erfiðleika í rekstri útgerðarinnar.

Nú kemur fram í fréttum að einmitt á þessum sama tíma jókst aflaverðmætið um 33%. Gróðinn hefur aldrei verið meiri.

Þvílík svika ríkisstjórn. Á sama tíma og vegakerfið grotnar niður, aldraðir og öryrkjar búa enn við stórfelldar skerðingar og ekkert fjármagn er til til að bæta hag þeirra verst settu, þá ætlaði ríkisstjórnin að færa hinum auðugustu gjöf upp á 2,7 milljarða.

Nú segir einhver beturvitringurinn að ég sé bara öfundsjúkur kommúnisti. Það er ekki rétt. Ég vill hafa atvinnulífið frjálst og sem mest laust undan oki ríkisins. Aftur á móti vill ég hafa sanngjarna og eðlilega viðskiptahætti. Enginn á að njóta forréttinda fram yfir aðra í skjóli ákvarðanna ríkisins. Þess vegna er óeðlilegt að örfáir aðilar fái sérleyfi frá ríkinu til að veiða í okkar sameiginlegu auðlind án þess að borga fyrir það eðlilegt gjald.

Lögfræðikostnaðurinn 8 falt meiri en bæturnar

Bubbi var í héraðsdómi dæmdur til að greiða Steinari Berg 250 þúsund og einnig helming lögmannskostnaðar hans, 1 milljón. Hann þarf einnig að greiða eigin lögmannskostnað sem líklega er annað eins eða meira. RÚV þarf einnig að greiða sömu upphæðir.

Lögfræðingarnir fá því 2 milljónir frá Bubba eða 8 sinnum meira en fórnarlambið, Steinar Berg.

Væri ekki betra að hægt væri að fara einhvers konar sáttaleið í svona málum?

Fálkaorðan orðin að gríni hjá forsetaembættinu

Forsetaembættið dritar niður fálkaorðum út og suður án þess, að því er virðist, að kanna bakgrunn þeirra sem hljóta. Jafnvel kokkurinn fær orðu og skiptir engu hversu góður eða vondur kokkur hann er, það er í það minnsta ekkert athugað. Í einni utanlandsferð getur forsetinn verið að úthluta allt að 42 orðum.

Ekki er hægt að skilja tilkynningu forsetaembættisins öðruvísi en svo, að þeir úthluti orðunum samkvæmt lista sem þeir fá sendan frá öðrum. Eru þeir að segja að þeir viti í raun ekkert um þetta fólk?

Skýrt er tekið fram að forsetinn sé yfirleitt ekki viðstaddur orðuveitingar í útlöndum.

Til hvers er verið að taka þetta fram? Er embættið að segja að þannig orður séu ómerkilegri en aðrar orður? Eða hver er eiginlega munurinn?

Ég hefði haldið að orðum ætti að úthluta til þeirra sem unnið hafa sérstök afrek í þágu annars fólks, til dæmis björgunarsveitamanna sem leggja sjálfa sig í hættu.

En þá er þetta bara orðið einhvers konar merkingarlaust grín hjá forsetaembættinu.

Keyptu Eimskip fyrir kvótagróða

Það er örstutt síðan ríkisstjórnin hugðist rétta kvótamönnum 2,7 milljarða úr ríkissjóði, vegna bágrar stöðu, að því er sagt var.

Nú bregður svo við að kvótamenn eiga nóg af peningum og kaupa 25% hlut í Eimskip fyrir 11 milljarða.

Þetta óligarka kerfi er nú þegar orðið mesta meinsemd þjóðfélagsins, að mínu mati. Auðurinn og völdin safnast á hendur fárra kvótamanna meðan almenningur býr við lökustu kjör á Norðurlöndum, að ekki sé talað um kjör farandverkafólks.

Trump lýsir frati á CIA og hringsnýst eins og vindhani

Það verður að teljast í meira lagi athyglisvert, að Trump, sjálfur forseti Bandaríkjanna, skuli lýsa yfir frati á CIA og jafnframt fullri hollustu við Pútín Rússlandsforseta.

Síðan hringsnýst maðurinn eins og vindhani og segist hafa verið að segja allt annað en hann sagði. Hann er búinn að gera sig að fullkomnum ómerkingi.